கவிதைகள் இசை

என் காதலியைக் கொல்ல வேண்டும்


என்னை ஒரு மனநோயாளி ஆக்க வேண்டும்
எனக் கடவுள் விரும்புகிறார்
அதற்காக அவர் என் வழிகளைக் குழப்புகிறார்
என் உறக்கத்தைக் கொத்தச் சொல்லி
பாம்புகளை ஏவுகிறார்
மண்டைக்குள் ஒரு அடுப்பை நிறுவி
அதை இருபத்தி நான்கு மணி நேரமும்
எரியூட்டுகிறார்
எப்போது வேண்டுமானாலும்
நிகழலாம் எனும்படிக்கு
என்னைச் சுற்றிலும் எண்ணற்ற தீமைகளை விதைத்தார்
ஆனால் எனக்கொரு காதலி இருக்கிறாள்
தாய் போல் என்னை மாரோடணைத்துக்கொள்கிறாள்
மடியிலே கிடத்தி களிமுத்தமிடுகிறாள்
கடவுளே
நீர் என்னை ஒரு மனநோயாளி ஆக்க வேண்டுமெனில்
முதலில் என் காதலியைக் கொன்றாக வேண்டும்