கவிதைகள் சைதன்யா

நீண்டகரையில் பெரும் நண்டுகள்

உங்கள் பள்ளிக்கூடத்தில்
நண்டு பிடித்து விளையாடியிருப்பீர்கள்

அதன் இரு கொடுக்குகளைக் கண்டு
பயந்திருக்கலாம்

மீனைக் கோர்த்து நூலைச் சுழற்றும்
நண்டு வலைக்காரனைப் பார்த்திருக்கலாம்

ஆறு வற்றிய இடத்தில்
பாசானத்தில் ஒட்டியிருந்திருக்கலாம்

இரு நண்டுகள் புணர்ச்சிசெய்துகொண்டிருந்தபோது
உற்று நோக்கியிருந்திருக்கலாம்

இரவில் படுக்கையறையெல்லாம்
நண்டுகளாய்க் கனவு கண்டிருக்கலாம்

குளம், குட்டைகளில்
பொந்தில் புதைந்திருக்கலாம்

காய்ந்த நண்டின் ஓட்டை
நடைபாதையில் மிதித்திருக்கலாம்

ஆனால்,
நண்பர்களே
நண்டுகள் உங்களை ஒருபோதும் கவனிப்பதில்லை

நீங்கள்
நண்டாக இருக்கிறீர்கள்.