இலா கவிதைகள்

வாழையிலைப் பந்தி

காற்றின் இடைவெளியில்
நிலவை ஒளித்து வைத்தேன்

கையகல வட்டத்திற்குள்
வாழையிலைப் பந்தி விரித்து
வகைவகையாய்ச் சமைத்து
என்னை நிரப்பி
என் வெளியும் நிரப்பினேன்

சுழலும் அகலின் சுடரைத் தொட
கண்களில் புன்னகையோடு
சட்டென்று குதித்து
நிலவின் மீதேறி
அமர்ந்துவிட்டேன்

கால்படாது

காப்பிக் கோப்பைக்குள்
எட்டிப் பார்க்கிறேன்
இன்னும் ஒரு சொட்டுக்காக

எட்டிப் பார்க்க முடிவதில்லை
கால்படாது
கரையில் நிற்கையில்

கருப்பு நிழல்

பென்சில் கூர்முனையின்
கருப்பு நிழல் அலைஅலையாய்
சதுரங்கச் சிப்பாய்களின்
தலைமேல் விழுகையில்
கிழிந்து கம்பி மேலாடிய காற்றாடி
பறக்கும் விமானம் மீதேறி
அமர்ந்துகொண்டது

செர்ரி மரம்

வாசல் செர்ரி மரத்தில்
இரண்டு பனிக்காலங்களாக
விரல் மடிப்புள் அடங்கும்
சிறு குருவியின் மாளிகை

இந்தப் பனி முடிந்தது
பூக்கள் மலர்ந்தன

காணாத குருவி
காலிக் கருப்பை

கவிஞரும் ஓவியருமான இலா, கலிபோர்னியாவில் கணவர் குழந்தைகளுடன் வசித்து வருகிறார். இவருடைய கவிதைகள் நவீன விருட்சம் இதழிலும் சொல்வனம் இணையத்திலும் வெளிவந்துள்ளன.